سلام بنات اخيرا جت اللحظه المنتظره يالله كم تمنيت يجي اليوم الي اكتب فيه قصتي وانا قايمه بالسلامه انا والنونو .. عقبال كل وحده يارب الزبده طبعا بداية قصتي موجوده في اخر مواضيعي لاني كنت اكتب متى نزلت السداده وكذا الحين بذكر لحظات الولاده بس بدا فيني الوجع مغص وظهري بينكسر الساعه ١٢ ظهر السبت يعني الم ع طول لاحظت انه منتظم لانه يجيني بشكل متواصل كل دقيقتين و ٣ دقايق كل مابغيت انام لان لي يومين مانمت ماقدرت كان الم شديد والله المهم صبرت وتحملت الوجع لين س ٨ العشاء لان الدكتوره ماراح تجي الا هالوقت ورحت بعدين شافتني قالت مفتوح ٣ سانتي قلت طيب انتي متى يخلص دوامك قالت ١٢ بعدها يجي دكتور المهم انا واهلي كنا رافضين رجال ورحنا مستشفى ثاني والالم مستمر مغص يعصر بطني ووجع نهاية ظهري المهم وصلنا المستشفى ع س٩ شافتني الدكتوره قالت ٤ خلاص تنويم ورحت غرفة الولاده وجلست اتوجع لين ١٢ ونص فتح ٧ والدكتوره فكت المويا بس يا بنات بعد مافكت المويا صح المغص مستمر بس لما يوقف اخذ فتره مرتاحه ولا كان فيني شي تقريبا نص ساعه والطلق هدا يعني صار شبه محتمل شوي ووالله دعيت لكل حوامل الحساب بس بعدين بدا الوجع الصدق الم طلق مستمر حتى مافيه راحه شويه يالله وجت س ١ ونص فتح بين ٨ و٩ هنا الصدق خلاص صرت اقول لاختي لانها جنبي ابغاا اموت خلاص اقتليني اذبحيني خلاص ماقدر اتحمل موتيني ههههههه يعني مريت بكربة الله يسهلها عليكم يارب ووصلت الساعه ٢ وثلت اخر الليل وفتح كامل واخس وجع لما تحسين بضغط راس الجنين من تحت ولسا يكون مش وقت طلوعه والله يابنات كنها سكرة من سكرات الموت الله يرحمنا بس المهم قالت لي بعطيك دقيقتين لانك بكر والراس لسا ما نزل الحوض ومرت الدقيقتين كنها سنتين اخر شي قالت يلا وقت الدف ساعدينا عشان البيبي لا يتعب ونخلص بسرعه المهم وادف ادف ماقدرت يعني لازم يكون نفسك طويل وتشدين ع نفسك وبمجرد ماتذكرين انها اخر لحظات الوجع راح تقوون نفسكم عشان تخلصون المهم وشوي طلع حمود الي طلع روحي هههههههه واحسن لحظه لما تسحبه تحسين كان مويا ثلج تصب ع بطنك الحمدلله وخيطتني وحسيت بالخياطه شوي رغم انها قالت سوت مخدر .. المهم يابنات مانمت لين عصر اليوم الثاني من الفرحه بس الصدق الخياطه متعبه مره يالله تقدرين تمشين ... والحمدلله كنت معلقه ع كلمه يالله يارب ياكريم مع كل وجع وابدا مابكيت مو راضي يطلع صوتي كان وجعي لداخل بس اخر شي في ٩ سانتي شوي طلع صوتي وصحت بس اختي مره منصدمه من قوتي هههههه والله يسهل عليكم يارب اهم شي ادعو يابنات واذكرو الله طبعا ابداا ماشربت اي مسهل لا خروع ولا غيره توكلت عالله وهو عاني ... الحمدلله اولا واخيرا